Коми-Пермяцкöй округлöн юркар судзöтiс Гран-при «Туристические города» нима II Всероссийскöй премиялiсь «Город этнокультурного туризма» нима номинацияын. «Кудымкар. От мифа к реальности» нима проект орддис Йошкар-Ола, Уфа да Саранск и вöлi шуöм медбурöн аслас категорияын.
Медбöрья кынымкö во коста Кудымкар лоис ассяма центрöн Прикамьелöн гастрономическöй да этнокультурнöй туризмлöн. Гöссез Россиялöн быдкодь каррезiсь локтöны пешлыны коми-пермяцкöй кухня, а быд лун коста ыждан интерес мифология дынö да обрядовöй культура дынö тшöктiс аркмöтны Коми-Пермяцкöй округын виль туристическöй маршруттэз, мероприятиеэз да арт-пространствоэз. Карлöн культурнöй оланлöн центрöн кольччö медваж Западнöй Уралын Коми-Пермяцкöй национальнöй драматическöй театр, а öння, популярнöй туристтэз коласын локация —Кудым-Ошлöн Аллея местнöй фольклорись геройезöн.
«Кудымкар. От мифа к реальности» нима проект премия вылын мыччалiс Кудымкарись администрацияись юралicь Ольга Ельцова. Сiя висьталiс, мый талун Кудымкарын аркмöтöм 20 туристическöй маршрутся унажык, кöдна коласын гастрономическöй туррез, фольклорнöй программаэз да ремесленнöй мастер-классэз.
«Интерес коми-пермяцкöй культура дынö быдмö чожа. Талун миян миффез да легендаэз сьöртi керöны фильммез да сриаллэз, аркмöтсьöны орсаннэз. Унажык турист локтö миян ордö, медбы кывны висьттэз да легендаэз, адззывны пуись идоллэзöс, пешлыны асьсö ремеслоэзын. Медколана и меддона ыджыт карись олiссез понда – вермыны вöрзьöтны мыйкö ассямаö, быльнöйö. Мийö гажöн торйöтчамö сiйöн быдкöт», - висьталiс Ольга Ельцова.
Кудымкарся вермисьöн «Туристические города» нима премияын лоис и Перем, кöда босьтiс наградаэз вит номинацияын. «Регионы туризма и гостеприимства» премия сьöртi, кöда сiдзжö чулалiс Россияись туристическöй регионнэз да каррез Форум вылын, Перем край лоис медбурöн куим категорияын.
Информационнöй справка
«Туристические города» нима всероссийскöй премия – быдвося награда, кöда сетсьö осьта конкурс итоггез сьöртi Россиялöн муниципальнöй образованнёэзлö да населеннöй пункттэзлö. Премия йитöм отечественнöй туризм да гостеприимстволöн индустрия зорöтöмкöт. 2025 воö вермасисö 47 кар страналöн 33 регионiсь. Нiя мыччалiсö очнöй защитаэз вылын туристическöй потенциал да чужан мулiсь ассяма торрез. Конкурс чулалiс 25 официальнöй номинация сьöртi Россияись туристическöй регионнэз да каррез Форум вылын.
Фото: информационный портал «Кудымкар», «Наш Урал»
Русский