«Коми мир» нима форум вылын баитасö коми-пермяцкöй кывлöн популяризация йылiсь

Кудымкарын чулалас «Коми мир» нима форум - кыклунся мероприятие, кöда йитöм коми кыв да письменность Лунöн. Форум öтлаöтас учёнöйезöс, гижиссезöс, артисттэзöc, кипода морттэзöс, велöтчиссезöc да активисттэзöс Республика Комиись да Прикамьеись быд пельöсiсь. Медшöр событиеöн лоас челядь да томпöлöс коласын национальнöй кывлöн популяризация сьöртi практикаэзлiсь обсужденнё.

Лун: 2025 вося май 23-24 луннэзö.

Места: Кудымкар, Верх-Иньва, Белоево (Кудымкарскöй округ) посаддэз.

Форумлöн медшöр событиеэз лоасö йитöмöсь кывкöт кыдз ловья да öння явленнёкöт. Томпöлöс понда площадка вылын баитасö учöттэз коласын кывлöн популяризация йылiсь. Аслас опытöн торйöтчасö «МИ» нима коми томпöлöс союзлöн представителлез, коми-пермяцкöй кыв вылын КВН-лöн орсiссез да кураторрез, этноблогеррез, анимационнöй фильммезлöн да кылö велöтан видеороликкезлöн авторрез да мöдiккез.

Научно-популярнöй лекторий вылын висьтасясö коми письменностьлöн аркмöм йылiсь, виль национальнöй литератруалöн подувпуктiсь Иван куратов йылicь, Каллистрат Жаков гижись йылiсь да Стефан Пермскöй православнöй миссионер йылiсь.

Форумлöн мероприятиеэз вылын участвуйтас Республика Комиись официальнöй делегация öтлаöн Романом Носковкöт - Республика Комиись национальнöй политика сьöртi министркöт. Сы составö сiдзжö пырасö учёнöйез, гижиссез, декоративно-прикладнöй искусство сьöртi кипода морттэз, артисттэз да томпöлöслöн движеннёэзiсь активисттэз.

Республика Комиись гижиссез — Нина Обрезкова и Александр Шебырев — мыччасясö Верх-Иньваын (Кудымкарскöй округ) литературно-поэтическöй площадка вылын. Литературно-поэтическöй площадка одзлань мунас Кудымкарын коми-пермяцкöй гижиссезкöт Вера Мелехинакöт да Василий Козловкöт. Форумлöн программаын — мастер-классэз, концерттэз Республика Комиись да Перем крайись творческöй коллективвезкöт, музыкальнöй променад Кудым-Ошлöн аллеяöт — маршрут карлöн тöдчана местаэзöт, а сiдзжö Никольскöй ярмаркалöн мероприятиеэз.
Форумлöн медшöр моггез — коми народдэзлöн культура популяризируйтöм, кыв да традиционнöй культура зорöтöм, самодеятельнöй творчество сьöртi коллективвез, декоративно-прикладнöй искусство сьöртi кипода отир, гижиссез коласын кужöммезöн, опытöн торйöтчöм.