Коми-Пермяцкöй национальнöй драматическöй театрлöн сцена вылын 2025 вося октябрь 19 лунсянь октябрь 26 лунöдз чулалö регионicь медтöдчана культурнöй форум, йитöм Россияись да матiсь зарубежьеись национальнöй театрррез. Таво фестиваль медодззаись лоис международнöй статуса: Кудымкарö локтiсö театральнöй коллективвез Арменияись, Татарстанiсь, Удмуртияись, Карелияись, Марий Элiсь, Ханты-Мансийскöй автономнöй округись да Пермскöй крайись.
Спектакллез чулаласö не только роч кыв вылын, но и национальнöй кыввез вылын синхроннöй вуджöтöмöн. Фестиваль чулалö конкурснöй основа вылын. Участниккезлiсь уджжез донтö жюри Евгения Тропп, Наталия Каминская, Наталья Жемгулене да Камиль Тукаев составын. Вермиссез лоасö «Лучшая режиссёрская работа», «Лучшая мужская роль», «Лучшая женская роль», «Лучшая работа художника» да «Гран-при фестиваля» номинацияэзын. Фестивальлöн программнöй директор — Татьяна Тихоновец, РФ культуралöн заслуженнöй работник, театральнöй критик, искусствоведеннёлöн кандидат.
Фестиваль осьтiс «Солнце» нима обско-угорскöй йöззэзлöн театр (Ханты-Мансийскöй автономнöй округ) «Родной земли напевы. Генезис» нима спектакльöн. Неделя коста видзöтiссезöс видзчисьöны быдöс странаись национальнöй театррезлöн постановкаэз, а сiдзжö Арменияись.
Фестивальлöн программа:
октябрь 20 лунö — М. Шкетан нима драмалöн Марийскöй национальнöй театр (Республика Марий-Эл), спектакль «Дядя Ваня» (16+);
октябрь 21 лунö — Коми-Пермяцкöй национальнöй драматическöй театр (Пермскöй край), спектакль «Живи и помни» (18+);
октяб 22 лунö — А. Савин нима драмалöн Лысьвенскöй театр (Пермскöй край), спектакль «Космос» (16+);
октябрь 23 лунö — Г. Игитян Эстетика Национальнöй Центр пыр «Метро» нима Театр (Армения), спектакль «Главное, чтобы не было скучно» (12+);
октябрь 24 лунö — Государственнöй национальнöй драматическöй театр (Республики Карелия), спектакль «Семь сов» (12+);
октяб 25 лунö — М. Горький нима Сарапульскöй драматическöй театр (Республика Удмуртия), спектакль «Русалка» (12+);
октябрь 26 лунö — Альметьевскöй татарскöй государственнöй драматическöй театр (Татарстан), спектакль «Конокрад» (16+).
Таво медодззаись фестиваль вылын чуалалас онлайн-программа. Видзöтiссез адззылассö «Ромео и Джульетта» (16+) нима спектакльлiсь видеоверсия Республики Карелияись Государственнöй Национальнöй театрлöн да «Лютый» (Явыз) (18+) нима спектакльлöн видеоверсия Альметьевскöй татарскöй государственнöй драматическöй театрлöн. Показзэз бöрын чулалас обсужденнё эксперттэзкöт.
«Фестиваль мыччалö, кыдз колана зорöтны миян унайöза регионлiсь этнокультурнöй ассямасö. Быд во «Сообщение» мыччалö вына да интереснöй программа ыджыт географияöн. Медтöдчана, мый Коми-Пермяцкöй драматическöй театр таво осьтiс 95-öт юбилейнöй сезон. Ась öння фестиваль лоас быдöс понда мыйöнеö ассямаöн!», - пасйис Перемскöй крайись культура сьöртi министр Алла Платонова приветственнöй кылын.
«Öння театр – этö сёрнитöм понда пространство, места, кытöн пантасьöны быдкодь культураэз да традицияэз, кытöн шогмöны виль идеяэз да вежöртассэз. Быд спектакль – этö ассяма путешествие мортлöн тöждöммезö, ловлöн зеркало, кöдаын мыччасьöны быдöс полöммес да кöсйöммес», - пасйис Коми-Пермяцкöй национальнöй драматическöй театрлöн юралiсь, РФ культуралöн заслуженнöй работник Анатолий Четин.
«Сообщение» нима фестиваль чулöтсьö Перем крайись губернаторлöн Администрация да культуралöн Министерство отсöтöн да пырö Коми-Пермяцкöй округлöн сё во кежö чулöтöм событиеэзлöн программаö. Сё во кежö событиеэзлöн программнöй дирекция - Пермский дом народного творчества «Губерния».
Коми-Пермяцкöй округлöн сёвося фестиваллез йылiсь быдöс актуальнöй информациясö верматö тöдны сайт вылын да социальнöй сеттезын.
Русский