«Планета» ТРЦ-ын кольöм шоччисян луннэзö чулалiс торжественнöй осьтöм «Традиция» нима выставкалöн, йитöм коми-пермяцкöй кывлöн вокöт да Коми-Пермяцкöй округлöн 100 вокöт. Проектлöн автор — этновокалистка да JULIM нима творческöй объединеннёлöн юралiсь Дарья Калина — мыччалiс ассяма коллекция квать образiсь, кöдна акрмисö народнöй искусство да мода коласын. Выставка чулöтсьö ноябрь 18 лунöдз.
Выставка «Традиция» йитö этнографиялiсь, дизайнлiсь да просвещеннёлiсь торрез, керö коми-пермяккезлiсь культурнöй наследие матöнжык öння видзöтiсьлö. Экспозицияын мыччалöм Дарья Калиналöн авторскöй коллекция, кöдаö пырöны йöрнöссэз, юбкаэз, топпез да корсеттэз натуральнöй тканнезiсь — лёнiсь да хлопокись. Быд образ йитö ас пытшкын быдпырся серрез да öння крой, мыччалö преемственностьлiсь да вужжез дынö уваженнёлiсь идея.
Проект йитöм регионлicь культурнöй традицияэз зорöтöмкöт да популяризациякöт. Видзöтiссез вермасö не только адззывны дизайнерскöй образзэз, но и вежöртны ловья народнöй культуралiсь атмосферасö — фактураэзын да пассэзын, кöдна мыччасьöны мода пырйöт.
«Коллекция «Традиция» — это менам кошшöм чушыктöм важ серрезын да тканнезын, кöдна видзисö ас пытшкын баббезнымлöн киэзлiсь шонытсö. Быд стежкаын — тöдвыв, быд серын — смысл, кöдö мийö гöрдззамö-пыртамö öння кадö. Коми-пермяцкöй культура ме понда — не музейнöй экспонат, а ловья материя, кöда вдохновляйтö, öтлаöтö поколеннёэз да отсалö миянлö вежöртны, мый традиция — это не важ кад йылiсь, а öння йылiсь, кöдö мийö аркмöтамö», — висьтасьö проектлöн аркмöтiсь, дизайнер да JULIM нима творческöй объединеннёлöн юралiсь Дарья Калина.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Эта во шуöм коми-пермяцкöй кыв Воöн, да вежалунся мероприятиеэс лоисö торöн ыджыт культурнöй программалöн. Вежалунся событиеэзлöн организацияöн да программнöй дирекцияöн занимайтчö Пермский дом народного творчества «Губерния».
Коми-Пермяцкöй округлöн сёвося фестиваллез йылiсь быдöс актуальнöй информациясö верматö тöдны сайт вылын да социальнöй сеттезын.
Русский