юӧррез

Медодззаись медбöрья 27 воö Перемись культуралöн институт öктö коми-пермяцкöй актерскöй студия. Аркмöм курс лоас öкмысöт театрлöн быдöс историяын. Кывзöм дынö корöны нывкаэзöс да зонкаэзöс 17-сянь 23-öдз коми-пермяцкöй кыв тöдöмöн. Быдöс абитуриенттэскöт, кöдна бура сетасö вступительнöй испытаннёэз, лоас гижöм договор, кöда обязательно сетö удж понда места Коми-Пермяцкöй национальнöй театрын.

Коми-Пермяцкöй округын оссис «Блогеры культуры» нима творческöй лаборатория - «Точка на карте. Точка интереса» нима образовательнöй программалöн тор, сiя реализуйтчö «Пермский край — территория культуры» нима проект сьöртi. Блогеррезöн асьнысö пешласö Кудымкарскöй округись 15 олiсь 50 вося пöрисьжык. Нiя велöтчасö социальнöй сеттезын уджалöм навыккезö, медбы висьтасьны коми-пермяцкöй культура йылicь.

Апрель 24 лунö Кудымкарын 85-iсь чулалiс «Парма» нима газеталöн приз вылö легкоатлетическöй эстафета. Юбилейнöй забег йитiсö Коми-Пермяцкöй округлöн сёвося юбилейкöт да Великöй Отечественнöй войнаын 80-вося Победакöт.

Ыджыт вежалун Юрлинскöй культурно-досуговöй центрын öтлаöтiс кык тöдчана дата — Коми-Пермяцкöй округлöн сё во да Юрлинскöй историко-краеведческöй музейлöн аркмöтöмсянь 45 во.

Пешнигортын апрель 29 лунö, кöр порйöтчö танецлöн Международнöй лун, чулалас памятьлöн рыт, йитöм Аркадий Лобановкöт — тöдчана балетмейстер-постановщиккöт, коми-пермяцкöй танецлöн велöтiськöт. Пыранiн быдöс понда сьöмтöм.

Апрель 19 лунö Кудымкарскöй муниципальнöй округись Кува посадын чулалiс «Вотчина-заводчина» нима заводскöй культуралöн фестиваль. Фестивальлöн гöссез тöдсасисö горнöй заводдэз кадö, röда йитöм öння Коми-Пермяцкöй округкöт.

2025 вося апрель 22 лунö чулалic коми-пермяцкöй кыв сьöртi велöтiссезлöн краевöй олимпиадалöн медбöрья очнöй тур, а сiдзжö велöтчиссезлöн, кöдна участвуйтiсö Россияись чужан кыввез да литератураэз сьöртi федеральнöй олимпиадаын Коми-Пермяцкöй округись велöтчиссез коласын, награжденнё. Поздравляйтамö быдöс вермиссесö да призеррэсö!

Коми-пермяцкöй Ыджыт лунлöн порйöтöм öктiс Архангельскöйын Коми-Пермяцкöй округись быдкодь районнэзicь, Кудымкарись да Перемись олiссезöс. Нiя адззылiсö лунвывся коми-пермяккезлiсь традиционнöй ритуаллэз да лоисö торöн ыджыт тулысся вежалунлöн, кöда мыччалö ловлiсь сöстöмтöм да öтлаöтöм.

КВН-лӧн Медодзза Лигалӧн (чулалӧ сія Перем крайын) аркмӧтіссез, кӧдна ӧтлаын региональнӧй властькӧт лыддьӧны 2025 во коми-пермяцкӧй кывлӧн воӧн, керисӧ тавося КВН-лӧн Медодзза Лигалісь символнас мармеладісь Ошӧс. Сія лоас цифровӧй инфлюенсерӧн, кӧда пондас нуӧтны КВН-лісь томпӧлӧс понда формат крайлӧн да страналӧн быд пельӧсӧ.

Пасха коми-пермяккез шуöны Ыджыт лунöн или Вежалун Ыджыт лун. Лыддиссьö, мый сiя öтлаöтö да сöстöмтö, корö керны бурсö быдöслö, кин гöгöрын. Чулöтöмлöн лун: апрель 20 лунö. Таво Ыджыт лун чулöтсьö витöтiсь. Программаын ойвывся коми-пермяккезлöн традиционнöй ритуаллэз: Ыджытлунся перезвон, волочёбнöй обряд – челядь пондасö мунны улицаöт народнöй орсаннэзöн, например, кольттез горкасянь быглалöмöн; ярмарка Пасхальный торжок, гастрономическöй и ремесленнöй мастер-классэз, Пасхальнöй спектакль, кöдаын орсасö местнöй народнöй артисттэз.